Sakapua Siriah

Kapado niniak mamak nan gadang basabatuah, pucuak bulek jo urek tunggang , nan dianjuang tinggi di amba gadang, pai tampek batanyo pulang bakeh babarito, nan baumpamo kayu gadang ditangah koto, urek taserak tampek baselo, batang gadang tampek basanda, dahan kuek buliah bagantuang, daun rimbun dapek balinduang, tampek balinduang kapanehan, tampek bataduah kahujanan, nan bakato bana, aia janiah sayak nyo landai, ikan jinak hukumnyo adia.

sarato nan mudo pambimbiang dunia, nan capek kaki ringan tangan, capeknyo indak ka panaruang, ringan tangan indak ka pamacah, aso tarantang duo sudah, hatinyo suci bamuko janiah, tau dimalu jo sopan, ereang jo gendeang, sarato raso jo pareso

baitu juoa untuak bundo kanduang, limpapeh rumah nan gadang, sumarak di dalam kampuang hiasan dalam nagari, kok hiduik tampaik banasa kok mati tampaik baniaik, ka undang-undang ka madinah, ka payuang panji ka sarugo.

kaurang banyak, nan indak baimbau namo jo basabuik gala, didalam cupak jo gantang dikanduang adiak jo pusako, ujuik tujuan buah rundiangan, sakiro paham di kahandaki, bahubuang dimaso nan kaditampuah, musim nan tumbuah iko kini, syariatnyo lai bahakikat, lahia kulik manganduang isi, lahian manjadi buah ama, dek enggeran sako nan tagak, koto aman alam santoso, salamaik korong jo kampuang, nak aman anak kamanakan

kini alah tabik edisi blog Bundo Kanduang, kaba barito dari awak untuak awak, tantang curaian jo paparan, bukan mahunjuak ma ajari, hanyo sekadar calak-calak pangganti asah.

Buletin Bundo Kanduang ado untuk mampatagok hubungan silaturrahmi diantaro kito, urang di rantau harapan baru dan sekitarnyo.

Bagai awa pamulai kato, Sipatan rundiang pandahuluan, Salam taunjuak ka pambaco, Kaganti bajawek tangan. Pucuak sitapo aka jumbai, Batang limpato dipatahkan, Bukan karano cadiak pandai, Pusako kato nan dipasambahkan.

Balaia sampan kalautan, Sarato jalo jo pukek harimau, Curaian adat nan dipapakan, Banamo adat Minangkabau . Tambiliang dibaliak lansek, Tasisiak dilambai lambai, Dibilang sado nan dapek, Nan tingga untuak nan pandai. Tibo di lansek mandailiang, Suruikkan bana ka jalan data, Kok ibo jo adat nan katagiliang, Turuikkan sajo roda baputa.

Tasandek tapak manurun, Takikih kaki dek mandaki, Adat jo syarak kok tasusun, Bumi sanang padi manjadi.

Kok salah mintak dibatuakan kok panjang mintak dikarek, kok senteng tolong dibilai kok kurang mintak ditukuak, nan elok tibo dari Allah nan buruak datang dari ambo.

Wassalamu’alaikum wr wb.
Redaksi